PN-BESI-TL realiza Semináriu Nasionál “Hasa’e konsiénsia públiku kona-ba BESI, Igualidade Jéneru Defisiénsia no Inkluzaun Sosiál (IJDIS) no Konserva Rekursu Bee (Mudansa Klimátika)” .

Iha intervensaun husi Prezidente Konsellu Fiskál PN-BESI-TL hateten, elementu vital ida ne’ebé mak atu asegura ba dezenvolvimentu ida mak asesu ba iha setór bee ne’ebé mak seguru, adekuadu, sustentável no inkluzivu. Ita nia Estadu liu husi Governu trasa ona planu estratéjia iha dezenvolvimentu nasionál tinan 2011-2030 ne’e mak opta ba iha dezenvolvimentu nasionál to’o iha tinan 2030 povu iha territóriu Timor laran tomak purvolta 90-100% asesu ona ba iha bee ne’ebé mak seguru, adekuadu no inkluzivu. Dadus sensus uma kain iha tinan 2022 ne’ebé mak relata mós katak uma kain sira ne’ebé mak asesu ba bee mota, bee lagoa, bee matan no irrigasaun sira, ne’e sei iha purvolta 8.7%, umakain sira ne’ebé mak to’o oras ne’e daudauk sei koleta udan been iha tempu udan hodi utiliza ba iha nesesidade báziku sira nia nune’e sei iha purvolta 0.2%, ita nia uma kain sira ne’ebé mak sei asesu ba iha perfurasaun sira iha purvolta 5.5%, no ita nia uma kain sira ne’ebé mak asesu ba iha torneira públiku purvolta 39.5%, no asesu ba iha torneira ne’ebé mak instala diretamente ba iha uma laran foin mak atinje purvolta 10%.

Ita haree mós ba iha aspetu Sosiál, fasilidade públiku sira ne’ebé seidauk adekuadu no Inkluzivu kontribui mós ba iha malnutrisaun ne’ebé mak sa’e maka’as purvolta 47.1% (liu-liu labarik tinan 5 mai kraik), aspetu ambientál Timor-Leste oras ne’e daudaun sai hanesan nasaun ida ne’ebé mak vulneravel tebes ba impaktu husi mudansa klimátika, ne’ebé mak husi estudu relata katak suku sira iha territóriu tomak purvolta 55% ameasa hela ba iha temperatura ne’ebé mak a ‘as, Inundasaun no rai monu, ida ne’e akontese tanba kontribui mós mai husi ita ema ninia atitude ne’ebé mak gosta estraga no sunu ai-horis sira, tanba ai-horis hirak ne’e sai vital ba kontribui no aumenta rekursu bee sira. Aleinde ne’e, aspetu polítiku liga ba alokasaun OGE kada tinan ba setór Bee no Saneamentu la liu 2%, konsiénsia públiku sei menus tebes liga ba sentimentu sai na’in ba fasilidade públiku sira.

Sekretáriu Estadu Eletrisidade Agua e Saneamentu (SEEAS), Sr. Santos Noronha iha Nia intervensaun no abertura hateten katak, ita ko’alia kona-ba setór Bee, Saneamentu no Ijiene ligadu ho ema nia vida, ligadu ba dezenvolvimentu no ligadu mós ho Ita nia futuru. Se karik bee la iha ita ema, ai-horis no balada sira hotu la bele moris, liga ba dezenvolvimentu setór bee, saneamentu ida ne’e pertinente tebes no sai hanesan xave ida ba iha dezenvolvimentu, setór hot-hotu, se karik bee la iha setór Agrikultura, infrastrutura, ekonomia sei paradu, liga ba futuru, karik komunidade konsumu Bee ne’ebé la kualidade, Saneamentu la di’ak inklui la iha Ijiene mak sei moras oin, liu-liu malnutrisaun (Labarik sira) liga ho cognitive/kakutak sira nian atu bele aprende ho di’ak .

Iha fatór barak mak sai hanesan obstákulu ba setór ida ne’e, fatór ida mak konsiénsia komunidade nian, komunidade barak mak la hetan bee no ita fó sala ba sira ne’ebé mak servisu kona-ba bee nian maibé iha parte balun mós komunidade sira falta konsiénsia, hodi viola ema seluk nia direitu atu asesu ba bee, tanba estraga bee sulin arbiru de’it. Tanba ne’e Governu da IX, liu husi Sekretáriu Estadu ba Eletrisidade Bee no Saneamentu (SEEAS) prontu atu koopera no kolabora nafatin ho entidade relevante sira seluk inklui NGO Nasionál no Internasionál, autoridade lokál sira atu bele halo diskusaun no fahe informasaun sira ba malu ligadu ho dezenvolvimentu setór Bee, Saneamentu no Ijiene iha Timor-Leste.

Enkuantu Partisipante sira ne’ebé partisipa iha Semináriu Nasionál ne’e mak hanesan, Exelentisimu SEEAS, Vise Prezidente Ezekutivu BTL.EP, Diretór Nasionál Desentralizasaun e do Governo Lokal, Diretór Nasionál Reguladór Agua e Saneamentu, Sefi Departamentu SEI, rep. PNDS, WATL, CITL, Adra TL, Sefi Suku Bairo-Pite, Asuntu Sosiál (MAE), Fundasaun Alola, F-HTL, EtaDep, Asosiasaun HAK, TLCE, GFFTL, Rep. Sefi Suku Madohi, Estudante UNPAZ, UNTL, UNDIL, inklui Média sira.

Atividade ida ne’e realiza hetan suporta husi organizasaun International Sanitation and Water for All (SWA).