Mekanismu Retroasaun Ideal no Efetivu
Planu asaun Komunidade hanesan meius advokásia ida mak konkorda hamutuk ho komunidade atu Grupu Maneja Fasilidade-GMF no membru komunidade rasik realiza hodi mellora di’ak liu tan tuir rekomendasaun husi servisu KPK nian. Iha parte seluk advokásia ba órgaun kompetente nu’udar prosesu ida atu asegura fornesedór sira konsidera aspetu kualidade sistema BESI, ne’ebé sensivel ba asuntu jéneru, asesibilidade, investimentu no mata dalan sira hodi asegura sustentabilidade husi programa BESI iha komunidade rurál, no mós ezizensia ba monitorizasaun husi governu tuir rekomendasaun KPK.
Introdusaun
Hahú kedas husi VI Governu Konstitusionál, sosiedade sivíl hola papél ativu hodi hala’o atividade akuntabilidade sosiál ho tipu oi-oin. HAK hola parte servisu ba bee, saneamentu no Ijiene-BESI hodi esplora oportunidade ba kapasitasaun kona-ba instrumentu sira akuntabilidade sosiál nian liu-liu prosesu Kartaun Pontuasaun Komunidade-KPK.
Durante periodu 2019-2022 HAK ho parseiru hala’o auditoria sosiál partikulármente atu hatene funsionamentu sistema bee no saneamentu iha área rurais liu husi diskusaun kartaun pontuasaun komunidade-KPK iha sistema bee rural 41, iha Munisípiu Manufahi 21 ho Munisípiu Liquiça 20. Rezultadu KPK hatudu funsionamentu Bee Saneamentu no Ijiene-BESI sai kontinua Problematiku nune’e husi diskusaun ne’e prodús planu asaun iha nivél komunidade atu mellora esforsu sira nune’e mós prodús rekomendasaun hodi relata ba autoridade kompetente iha nivél Munisipál no Nasionál.
