HAK ho Parseiru Realiza Dialogu BESI hanesan Direitus Umanus iha Munisípiu Bobonaro
Bobonaro - HAK hamutuk ho PN BESI TL, GFFTL, Pontu Fokal Fongtil Bobonaro no hetan suporta husi WaterAid Timor-Leste realiza dialogu ho tema : Hasa’e konsiénsia ba Autoridade munisipál no parseiru dezenvolvimentu liu husi fahe Lisaun aprendida Kartaun Pontuasaun Komunidade-KPK. Sorumutu ne’e nu’udar mekanismu diálogu atu fahe informasaun kona-ba bee, saneamentu no ijiene-BESI hanesan direitus umanus ba autoridade munisipál, Postu no organizasaun sosiedade sivíl sira iha Bobonaro no fahe lisaun aprendizajen sira kona-ba modelu KPK no ferramentu sira ne’ebé bele kontribui ba melloramentu Bee Saneamentu no Ijiene-BESI iha komunidade, aumezmu tempu hasa’e kompriensaun no apoiu dezenvolvimentu polítika no desizaun sira nivel munisipál iha BESI. Iha loron 17 Juñu Ekipa hala’o teste ba bee matan Boe Mali iha Raifun Foho, kontinua diskusaun ho Estrutura Grupu Maneja Fasilidade-GMF iha Aldeia Nunutana. Iha 18 Juñu Ekipa realiza sorumutu nivel Munisipal.
Iha sesaun abertura Diretór HAK hato’o nia intervensaun katak, servisu ne’ebé ho parseiru sira halo hetan apoiu husi WaterAid Timor-Leste, iha Munisípiu rua (Manufahi no Liquiça). Servisu sira ne’e sai lisaun aprendizajen ba setór sira iha Munisípiu Bobonaro oinsá materializa iha asaun konkreta liu husi planeamentu Munisipal. Iha planu estratéjia dezenvolvimentu nasionál-PEDN 2011-2030, komprimisu governu nian 2030 ema hotu asesu ba bee. Atu hatete dala barak povu sei halerik ba bee moos la’ós iha Munisípiu Bobonaro de’it, iha kapital Dili mós seidauk asesu bee ho di’ak. Tinan kotuk Governu no sosiedade sivíl halo diálogu nasionál iha Loelaco hodi koalia kona-ba oinsá atu buka solusaun ba setór lubuk ida maibé ohin loron HAK ho ninia parseiru hamutuk ita koalia ba asuntu bee, hanesan istória ida ba ita boot sira tanba ita bele dada lia hamutuk hodi tulun malu ba bem estar sosiedade iha Munisípiu Bobonaro.
Reprezentante WaterAid, Sra. Livia da Cruz iha intervensaun; WaterAid nia foku servisu ba bee, saneamentu no ijiene-BESI ba komunidade rurál iha Munisípiu Manufahi no Liquiça, servisu seluk iha aspetu mudansa klímatika, asuntu jeneru no inkluzaun sosiál. WaterAid Timor-Leste ho nia parseiru SMASA ne’ebé ohin loron presenja husi Diretór SMASA Munisípiu Manufahi no Liquiça ho Xefi Suku Loidahar sei fahe lisaun aprendezajen sira husi esperiensia implementasaun programa durante ne’e.
Reprezentante Prezidenti Autoridade Munisípiu Bobonaro, Sr. Julio Carvalho Pereira iha nia intervensaun, Komunidade sira iha direitu atu asesu bee bee maibé iha dever mós atu tau matan. Ejijensia komunidade bo’ot, fasilidade sira ita oferese loron rua, loron tolu aat fila fali ona. Dezafiu mudansa estrutura Governu, konsiensia komunidade biar nune’e agora haree ba oin. Ha’u espera katak programa ohin atu sosializa nee, iha Diretór SMASA ho grupu GMF atu ita bele haree hotu. Ita rona husi Diretór SMASA Liquiçá ho Manufahi, pratika di’ak sira no ita foti hodi bele implementa. Buat hotu ita bele halo maibé ita presiza fó sosializasaun ba komunidade sira iha baze .Se lae! ita gasta osan barak maibé la iha sustentabilidade.
