Bee Posu Fó Risku Ba Saúde
DILI, STLTIMORLESTE.com – Tuir peskiza neebe Ministeriu Saude (MS) halo hatudu katak, bee posu risku ba ema nia saude, tanba nee husu komunidade tenke konsumu bee moos, atu nunee labele moras. “Bee posu neebe ita nia komunidade sira utiliza ba moris loron-loron nee fo risku ba saude,” hatete Visi Ministru Fortalesimentu Institusional Saude, José dos Reis Magno ba jornalista sira iha HNGV, Segunda (29/07/2024).
Nia dehan, risku tanba udan nee akontese inundasaun, no bee posu sira hotu bee mota tama kontamina ona hofoer, maibe komunidade sira utiliza deit, liu- liu iha Munisipiu Kovalima nian.
“Hau atu dehan, loos duni bee posu nee risku ba ema nia saude, tanba bainhira rezulta ona inundasaun signifika katak foer ona, tanba nee wainhira udan tenke supa sai tiha bee sira iha posu laran, hamoos tiha halo mos mak bele utiliza fali, atu nunee labele lori moras ba komunidade neebe utiliza posu refere,” nia esplika.
Nia informa, Ministeriu relevante sira atu idak-idak bele halo nia servisu, hodi kontrolu bee posu sira neebe mak risku ba saude ema nian, atu bele tau iha importansia hodi bele hadia.
“Ita husu ba Ministeriu relevante sira sei halo nia servisu hodi tau matan ba bee posu sira, atu nunee ita nia komunidade konsumu bele livre husi moras,” nia deklara.
Iha fatin ketak, Xefe Suku Kaikoli, Postu Administrativu Nain Feto, Munisipiu Dili, Hipolito Marques Sarmento informa, Suku Kaikoli hakarak kontribui suku seluk iha area urbana hetan bee moos, tanba Suku Kaikoli nee komunidade utuliza bee posu.
“Ami Suku Kaikoli utuliza deit mak bee posu, maibe komunidade seidauk hetan moras impaktu husi bee, tanba nee ami hakarak suku sira seluk hetan uluk lai, depois mak ami hetan bee moos,” nia informa.
Nunee mos Ernesto da Costa iha Suku Kaikoli, komunidade sira laiha bee torneira, iha deit bee posu mak komunidade utiliza.
“Ita laiha bee tornera, ita iha deit bee posu mak komunidade sira utiliza ba moris loron-loron, ita hetan bee posu mos diak ona, duke suku sira seluk iha Sidade Dili bee araska, sira sosa bee hodi haris no tein,” nia afirma.
Fontes ; https://stltimorleste.com/saude/bee-posu-fo-risku-ba-saude/
