Wateraid Timor-Leste Entrega Fasilidade Bee, Saneamentu, no Ijiene Inkluzivu iha Fasilidade Kuidadu Saúde 2 ba Servisu Saúde Munisipiu Manufahi
Press Release
Wateraid Timor-Leste Entrega Fasilidade Bee, Saneamentu, no Ijiene Inkluzivu iha Fasilidade Kuidadu Saúde 2 ba Servisu Saúde Munisipiu Manufahi
Luak, Manufahi - 29 Maiu 2025 - WaterAid nudár organizasaun naun-governamental internasionál ne’ebé foka nia intervensaun iha setór bee, saneamentu, no ijiene (BESI). WaterAid Timor-Leste integra ona nia intervensaun ho aspetu xave sira hanesan reziliénsia klimátika no igualdade jéneru, defisiénsia, no inkluzaun sosiál (IJDIS). Servisu hirak nee WaterAid Timor-Leste halo hodi bele atinji ami nia vizaun ema hotu iha ne’ebé de’it iha asesu seguru no assesivél ba bee, saneamentu, no ijiene. Organizasaun ida nee hahú servisu iha Timor-Leste iha tinan 2005, tuir mai iha 2007, WaterAid iha Timor-Leste komesa habelar servisu BESI ba iha munisipiu Liquiçá no ikus mai haluan tan ami-nia area kobertura ba iha munisipiu Manufahi iha tinan 2011.
WaterAid Timor-Leste iha nivel munisipiu Manufahi, iha kooperasaun servisu di’ak ho Prezidente Autoridade Munisipiu Manufahi, Servisu Munisipál Água, Saneamento e Ambiente (SMASA), Servisu Saúde Munisipiu Manufahi no parseiru implementador Fundasaun Luta ba Futuru (F-LBF), Fundasaun Luta ba Mudansa (FLBM), no FAKMS hodi haforsa sistema servisu saúde liuhusi suporta haforsa koordenasaun servisu, planeamentu departamentu servisu saúde munisipál, apoiu dezenvolve no revizaun ba Planu Estratéjiku Munisipiu Bee, Saneamentu, no Ijiene (BESI), apoiu mantein deklarasaun suku ijiéniku, no dezenvolve material mudansa hahalok ijiéniku. Iha parte servisu fíziku, WaterAid Timor-Leste ho apoiu husi Governu Australia liuhusi Australian NGO Cooperation Program (ANCP) fornese ona apoiu finanseiru ba WaterAid nia programa Haforsa Moris Saudável (HAMOS) hodi bele halo ona manutensaun no konstrusaun foun fasilidade bee, saneamentu, no ijiene inkluzivu iha Fasilidade Kuidadu Saúde sira iha munisipiu Manufahi. Fasilidade inkluzivu hirak nee maka hanesan instalasaun bee moos, fasilidade fase liman, rampa hodi asesu ba postu saúde, rampa ba sentina hamutuk ho pakote sentina inkluzivu atu nune’e maluk defisiente, idozu, no inan-isin rua sira bele utiliza ho seguru.
Fasilidade BESI inkluzivu hirak nee ami fornese ona ba SSK Fatuberliu no Internamentu Luak, total gastu ba konstrusaun hirak nee maka $19,286.83, total gastu ida nee mai husi Servisu Saúde Komunitária Fatuberliu $10,825.63 no Internamentu Luak, hamutuk $8,461.20. Periodu konstrusaun ba fasilidade BESI inkluzivu iha fasilidade kuidadu saúde nee hahú husi Abril 2024 no kompleta iha Marsu 2025.
No ohin loron, dia 29 fulan Maiu tinan 2025 ofisiálmente ami entrega ona fasilidade BESI inkluzivu iha FKS 2 nee ba Governu Munisipiu – liuliu ba Servisu Saúde Munisipiu Manufahi ho espetasaun Servisu Saúde Munisipiu Manufahi bele kontinua asegura fasilidade BESI inkluzivu hirak nee nia sustentabilidade hamutuk ho pesoál saúde no pesoál tékniku sira iha FKS sira. Iha dia 27-28 Maiu, ami mós fornese ona treinamentu operasaun no manutensaun durante loron 2 ba pesoál saúde no pesoál tékniku sira iha Fasilidade kuidadu saúde sira ne’ebé WaterAid Timor-Leste halo ona intervensaun ba. Partisipante sira nia total hamutuk 20 husi Postu Saúde 11 no SSK 4. Treinamentu refere ho objetivu atu ajuda pesoál saúde sira bele iha kapasidade natoon hodi halo operasaun no manutensaun ki’ik ba fasilidade BESI inkluzivu sira ne’ebé hetan estragus ki’ik atu nune’e pesoál saúde no komunidade sira bele kontinua uza ho di’ak ba tempu naruk.
Ba informasaun kle’an liu tan bele kontaktu:
Marlinda Jeronimo
Ofisiál Komunikasaun no Suporta Dezenvolvimentu Negósiu
WaterAid Timor-Leste
marlinda.jeronimo@wateraid.org.au
