WaterAid Timor-Leste Fornese Treinamentu Operasaun no Manutensaun Fasilidade BESI Inkluzivu iha Fasilidade Kuidadu Saúde (FKS) ba Pesoál Saúde sira iha Munisipiu Liquiçá
Iha loron 14 no 15 fulan Maiu, ekipa WaterAid Timor-Leste liu-husi programa Haforsa Moris Saudável (HAMOS) provida ona treinamentu operasaun no manutensaun fasilidade bee, saneamentu, no ijiene (BESI) inkluzivu iha Fasilidade Kuidadu Saúde (FKS) ba pesoál saúde iha munisipiu Liquiçá.
Diretór País WaterAid Timor-Leste (WATL), Sr. Justino da Silva, iha diskursu abertura hateten katak objetivu husi treinamentu loron rua ida nee ho objetivu atu bele hasa’e pesoál saúde nia abilidade no koñesimentu hodi bele halo manutensaun kiik ba fasilidade BESI inkluzivu ne’ebé ladún funsiona ona ho di’ak iha sira-nia postu saúde. Husi nee, pesoál saúde mós bele foti sira nia papél ativu ba fasilidade hirak nee nia sustentabilidade.
Iha fatin hanesan, Sr. Sekretáriu Munisipiu Asuntu Sosiál Munisipiu Liquiçá mós fó sai nia espetasaun “husi treinamentu ida nee ita bele utiliza fila fali fasilidade sira ne’ebé instala ona ho máximu nunee ita bele fo atendimentu di’ak ba komunidade sira”.
Durante treinamentu, WaterAid Timor-Leste nia Koordenadór Tékniku Sr. Domingos Alves fasilita sesaun sira utiliza manual operasaun no manutensaun fasilidade BESI iha FKS ne’ebé produz husi ekipa WaterAid Timor-Leste. Treinamentu loron rua ida ne’e lao ho sesaun importante sira ne’ebé loke uluk ho sesaun abertura husi Sekretáriu Munisipiu Asuntu Sosiál Munisipiu Liquiçá no Diretrór País WATL, sesaun Salvaguarda no Programa Seguru, no kontinua ho sesaun teoria kona-ba O&M ba fasilidade BESI inkluzivu iha FKS, liu-liu atu bele koñese asesoris no ferramentas sira. Partisipante sira mós hetan oportunidade hodi bele prátika sira-nia koñesimentu foun ida nee liu-husi halo manutensaun kiik ba fasilidade bee, saneamentu, no ijiene iha edifisiu Servisu Saúde Munisipiu Liquiçá.
Hafoin kompleta tiha treinamentu loron rua refere, Doutora Beatriz Rodrigues Pereira husi Postu Saúde Maumeta espresa nia sentimentu kontente tanba bele aprende ona kona-ba matadalan operasaun no manutensaun ba fasilidade BESI inkluzivu iha Fasilidade Kuidadu Saúde sira, síkulu operasaun no manutensaun, asesoris no ferramentas, salvaguarda no programa seguru. Nia hatutan, “koñesimentu foun hirak nee bele ona tulun ami hodi bele foti asaun rasik hodi hadi’a fasilidade BESI ne’ebé aat iha ami nia Postu Saúde no halo ami komprende ona kona-ba prosesu atu ami bele husu tulun ba Servisu Saúde Munisipiu Liquiçá”.
Atividade ida nee hetan apoiu husi Governu Australia liu-husi Australian NGO Cooperation Program (ANCP).
