WaterAid Timor-Leste hala’o sosializasaun no formasaun ba nia Produtu Komunikasaun Mudansa Hahalok ne’ebé foin prodús kona-ba saneamentu no ijiene
WaterAid Timor-Leste ho Xefe Tékniku – Saúde, Sra. Bernice Sarpong hala’o sosializasaun no formasaun ba materiál komunikasaun mudansa hahalok (BCC) ne’ebé foin prodús kona-ba saneamentu no ijiene. Workshop loron 2 ne’e ho objetivu atu introdus material saneamentu no ijiene BCC ne’ebé foin prodús ba parseiru implementadór WaterAid Timor-Leste no parseiru governu sira partikularmente Ministériu Saúde, Ministériu Edukasaun, no SMASA husi tantu munisípiu Liquiça no Manufahi. Produtu sira ne'ebé lansa maka flipchart, storyboard, planu lisaun, atividade sira, animasaun vídeo, no knananuk ne'ebé alvu ba públiku xave tolu seluk hanesan komunidade, labarik eskola sira, no foin-sa'e sira.
Dili – Iha loron 24 no 25 fulan Jullu WaterAid Timor-Leste ho nia Xefe Tékniku – Saúde, Sra. Bernice Sarpong hala’o sosializasaun no treinamentu ba matéria komunikasaun mudansa hahalok (BCC) ne’ebé foin prodús kona-ba saneamentu no ijiene. Workshop loron 2 ne’e ho objetivu atu introdus material saneamentu no ijiene (BCC) ne’ebé foin prodús ba parseiru implementadór WaterAid Timor-Leste no parseiru governu sira partikularmente Ministériu Saúde, Ministériu Edukasaun, no SMASA husi tantu munisípiu Liquiça no Manufahi.
Diretór Nasaun WaterAid Timor-Leste, Sr. Justino da Silva iha nia diskursu abertura hateten katak eventu ne’e hanesan oportunidade di’ak ida husi ita-nia kooperasaun mútua, no WATL asina ona MoU ho Ministériu Saúde ne’ebé trasa variedade atividade. MoU ho Ministériu Saúde foka iha koordenasaun no kooperasaun iha saúde inklui ho fasilidade saúde sira. Agora, materia BCC kona-ba saneamentu no ijiene prodús ona liuhosi konsulta barak no peskiza formativu ne’ebé sei uza ba sosializasaun, no formasaun ba komunidade, pesoál saúde, no profesór sira. Materiál BCC sira-ne'e dezenvolve bazeia ba realidade iha kampu.
Diretora Nasionál Edukasaun no Promosaun Saúde, Sra. Emelia Mendonça iha ninia intervensaun abertura hateten katak Diresaun Nasionál Edukasaun no Promosaun Saúde servisu hela ba mudansa hahalok ba komunidade nia moris saudavel ne’ebé iha korelasaun aas ho materiál BCC ne’ebé produz husi WaterAid Timor- Leste. Nune’e, Diresaun Nasionál Edukasaun no Promosaun Saúde sei kontinua ita-nia kooperasaun ho entidade hotu-hotu inklui WaterAid Timor-Leste. Nia hatutan tan katak, mezmu matéria BCC sira ne’e sei implementa iha Liquiçá no Manufahi, maibé ami sei uza matéria sira ne’e ba sosializasaun iha munisípiu sira seluk mós hodi enkoraja mudansa hahalok iha komunidade nia laran.
Sr. Arantes Isaac nu’udar reprezentante Vise-Primeiru Ministru Timor-Leste iha sesaun abertura ne’e hateten katak workshop ida ne’e esensiál ba parte interesada sira hotu nu’udar ajente halo mudansa iha hahú mudansa hahalok iha komunidade nia le’et. Nia hatutan katak, Governu iha kompromisu boot tebes partikularmente Vise-Primeiru Ministru Timor-Leste atu koopera ho ministériu no parseiru sira seluk.
Materiál sira BCC nian kona-ba saneamentu no ijiene ne'ebé lansa iha loron 24-25 fulan-Jullu maka Flip chart, atividade sira, no storyboard ne'ebé produz ba komunidade nu'udar audiénsia xave. Aleinde ne’e, planu lisaun, atividade no animasaun vídeo alvu ba labarik eskola sira ho idade 6-12, no audiénsia alvu seluk mak foin-sa’e sira ne’ebé uza knananuk ne’ebé produz.
