Workshop Hametin sustentabilidade instituisaun WASH nian atu sai reziliente ba mudansa klimátika

Iha loron 17 fulan Setembru, sosiedade sivíl iha munisípiu Manufahi kompostu husi Fundasaun Luta ba Futuru (F-LBF), Luta ba Mudansa (LBM), no Feto Asaun Kreativu (FAKMAS) hamutuk ho diretór SMASA Manufahi organiza workshop nivel munisípiu ho ho tema "Hametin instituisaun WASH nia sustentabilidade hodi reziliente ba mudansa klimátika iha salaun Da Monthana, munisípiu Manufahi."

Objetivu husi workshop ida ne’e atu fahe rezultadu husi parseiru implementador sira nia servisu tuir programa HALIRAS inklui dezafiu ne’ebe sira hasoru atu nune’e bele identifika solusaun potensial alternativa ba sistema WASH iha Manufahi partikularmente iha area rural.

Armando Da Silva, diretór F-LBF nian iha aprezentasaun ida-ne'e hatete katak atór munisipál sira iha Manufahi tenke fó prioridade ba sustentabilidade programa sira ne'ebé hetan apoiu hosi parseiru dezenvolvimentu sira liuliu kestaun sira mudansa klimátika nian hodi asegura reziliénsia no sustentabilidade iha kombate impaktu sira.

Nia hatutan, dezafiu ne’ebé sira hasoru mak aspetu sustentabilidade husi programa sira ne’ebé durante ne’e ami hala’o. Partikularmente infraestrutura WASH ne'ebé harii ona ne'ebé bele hetan estragu tanba tempu ne'ebé estremu no mós bele halo maran bee-matan sira. Nune'e, governu iha nivel munisípiu tenke fó prioridade ba aspetu sira reziliente no sustentabilidade nian iha setór WASH.

Diretór SMASA Manufahi, Sr. Domingos Soares iha ninia diskursu abertura espresa katak mudansa klimátika sai dezafiu ba infraestrutura WASH nian partikularmente sistema bee-moos sira. Maibé, sustentabilidade sistema bee nian la'ós de'it depende ba SMASA no nia parseiru sira maibé depende ba ema hotu liuliu governu munisípiu nia esforsu atu harii komunidade nia sentidu propriedade nian hodi proteje sistema bee nian ne'ebé instala ona.

Nia hatutan katak, ita labele garante sustentabilidade ba infraestrutura WASH nian se komunidade kontinua tesi ai-horis sira, no la proteje ambiente ne'ebé afeta ba sistema bee nian sira ne'ebé instala ona tanba débitu bee nian bele tun iha futuru.

Diretór nasaun WaterAid Timor-Leste nian iha nia intervensaun abertura mós destaka katak WaterAid Timor-Leste hanesan serbisu iha Manufahi durante tinan 10 resin ona no foka ba programa sira WASH nian ne'ebé integradu ba GEDSI no mudansa klimátika inklui programa saúde sira ne'ebé relasiona ho WASH no kuidadu saúde fasilidade sira. Nia hatutan, WATL nia programa WASH sei kontinua implementa iha Manufhi maske WATL sei taka nia eskritóriu iha Manufahi iha tinan ida ne’e. Nia taka nia diskursu hodi hatete katak WATL kontribui ona atu atinji ema 84% iha asesu ba bee, 95% asesu ba saneamentu, no konstrui ona fasilidade saúde 23, no postu saúde WASH inkluzivu 4. Tanba ne'e, iha mudansa signifikativa boot ne'ebé bele hetan no ajuda inan isin-rua sira no pasiente sira.

Reprezentante Prezidente Autoridade Munisipál Manufahi nian Sr. Aleixo de Deus haktuir katak governu munisipál iha papél no kompromisu atu sosializa no mitiga efeitu mudansa klimátika ba infraestrutura WASH nian. Nia mós hato’o agradesimentu ba ONG lokál sira no parseiru dezenvolvimentu sira ne’ebé kontinua fó apoiu ba governu munisípiu Manufahi hodi atinje marku sira-ne’e.

Iha mós sesaun partilla ne’ebé lidera husi Xefe suku no komunidade ne’ebé fahe oinsá sira esperiénsia hela mudansa ne’ebé signifikativu liu pesoalmente no iha sira-nia nivel komunidade relasiona ho programa WASH ne’ebé implementa husi WaterAid Timor-Leste hamutuk ho nia parseiru implementadór sira FLBF, LBM, no FAKMAS iha Manufahi.

Atividade ne’e hetan apoiu husi Governu Australia liu husi Fundu Be’e ba Feto.