Dezenvolve Mapamentu Risku Mudansa Klimátika iha Liquiçá
Workshop hodi dezenvolve perfíl no mapamentu mudansa klimátika tuir kontextu munisipiu Liquiçá ajuda ona identifika sub-tipu perigu mudansa klimátika 20 husi tipu 5 maka akontese ona iha Liquiçá durante periodu tinan 5 nia laran (2019-2023)
Workshop Dezenvolve Mapamentu Risku Mudansa Klimátika iha Liquiçá!
Hafoin kompleta tiha workshop dezenvolve mapamentu risku mudansa klimátika iha Munisipiu Manufahi, tuir mai ho apoiu husi Governu Munisipiu ekipa WATL hamutuk ho parseiru implementadór sira organiza fali soru-mutu ne’ebé hanesan iha munisipiu Liquiçá iha loron 6 fulan Dezembru ho setór xave sira hodi bele dezenvolve fali mapamentu perigu mudansa klimátika munisipál tuir kontextu munisipiu Liquiçá nian. Importánsia husi workshop ne’e sei ajuda apoiu planu setór xave munisipál atu bele sensivel no preparadu ba hasoru perigu husi mudansa klimátika nivel munisipál.
Atividade ne’e hahú ho intervensaun husi WATL nia Country Director, Diretór SMASA Liquiçá, Reprezentante Administradór Liquiçá, no Diretóra Nasional Sentru Informasaun Edukasaun Ambientál (DNCIEA) ne’ebé subliña kona-ba atu bele tau importánsia ba asuntu mudansa klimátika no nia implikasaun ba fornesimentu bee, ema nia moris inklui planu ba mitigasaun no adaptasaun ba alterasaun klimátika.
Sesaun tuir mai maka reflesaun kontextu husi Xefe GMF Pukelete, Xefe Aldeia Morae, no Rep. Komandante APC ne’e maka ko’alia kona-ba difikuldade komunidade hasoru husi alterasaun klimátika liu-liu akontesimentu inundasaun ne’ebé implika ba komunidade nia asesu ba bee moos.
Iha mós aprezentasaun husi WATL nia Diretór Programa kona-ba Perfíl Perigu Mudansa Klimátika no tipu husi perigu sira, DNCIEA halo aprezentasaun ba situasaun klimátika munisipiu Liquiçá ne’ebé komesa ona iha alterasaun, sesaun ne’e taka ho aprezentasaun husi PERMATIL ne’ebé fahe lisaun aprendizajen kona-ba konservasaun rekursu bee uza métodu natural.
Sesaun ida ne’e kontinua ho diskusaun no aprezentasaun rezultadu diskusaun grupu ne’ebé fahe tuir tipu perigu mudansa klimátika hanesan meteorolójiku, klimatolójiku, ídrolójiku, geofízika, no biolójiku. Husi diskusaun ne’e, partisipante husi setór xave BESI munisipiu Liquiçá dezenvolve ona mapamentu perigu mudansa klimátika nivel munisipiu Liquiçá ne’ebé hatudu katak prátika komunidade nian ne’ebé la proteje ambiente fó kontribuisaun boot ba perigu mudansa klimátika, sub-perigu mudansa klimátika 20 husi tipu 5 maka akontese ona iha Liquiçá iha tinan lima ikus ne’e nia laran ho ameasa boot ba komunidade, ai-horis, animal, no infrastrutura sira.
