GFFTL- ho Parseiru sira Selebra Loron Internasionál Feto iha Suku Fatumasi

Objetivu husi atividade sira iha selebrasaun loron internasionál feto tinan ne’e mak : atu dignifika feto nia kontribuisaun iha setór oi-oin iha prosesu dezenvolvimentu nasionál iha Timor-Leste, dezafia no motiva feto maluk sira hodi partisipa ativu no involve aan iha atividade oioin iha Suku Fatumasi hodi hakle’an sira nia koñesimentu iha area oioin, hasa’e konsiensia komunidade sira konabá asuntu igualdade jéneru no direitus umanus hodi redús diskriminasaun sira hasoru feto iha família no sosiedade, komunidade bele hatene kona-ba oinsá refere ka hato’o kazu bainhira sira hetan no hare violénsia akontese,motiva pesoal, familia, no komunidade hodi halo mudansa ba hahalok hasoru feto no labarik feto sira, atu labele limite abilidade hodi kontribui ba dezenvolvimentu iha Suku, Postu, Munisípiu no ba nasaun.

Partisipante ba atividade ne'e rasik mai husi : Reprezentante SEI Nasionál (Xefe Departamentu prevensaun no kombate Violénsia Bazeia ba jéneru ) ho Ekipa, Reprezentante WaterAid (Ofisiál GEDSI),Reprezentante PAM Munisipiu Liquiça (Sekretáriu  Asuntu Sosial)  ,Administradór Postu Administrativu Bazartete, Komandante VPU ho Ekipa, Xefe Sentru Saúde Bazartete, Xefe Suku Fatumasi, Xefe Aldeia Metir, Pontu Fokál SEI Bazartete no Maubara, Diretóra Asaun Sosial/ Pontu Fokál SEI Munisipiu Liquiça ,Prezidente OEFADEL,Xefe Departamentu Inkluzaun Sosial ,MSSI ,Parseiru Implementador (FHTL,PNBESITL),Parseiru Internasionál (Abundant Water) ,PNTL Bazartete, Komunidade Suku Fatumasi Aldeia Metir

Xefe Suku Fatumasi Sr. Elizario Freitas  iha ninia intervensaun Agradese ba Maromak ba biban tomak ne’ebé entrega ona mai ita. Parabéns ba oradór sira. Intervensaun sira hau empresta hanesan Xefe Suku Fatumasi agradese ba parte hotu bele fahe ona informasaun sira bele kabe ona ba igualdade jéneru, asaun sosiál sira, protesaun sira.

Feto sai mós fatór importante ida ba dezenvolvimentu rai ida ne'e. feto presiza kapasitasaun atu bele partisipa iha atividade hotu. Atu informa ba inan aman sira katak kazu sira ne’ebé akontese ami sai fontes de’it.

Informasaun husi asaun sosiál inan aman sira rona bele fahe fali ba viziñu seluk ne’ebé mak ohin la partisipa.

Rekomendasaun balun: formasaun ba feto sira bei-beik labele halo iha loron feto de’it maibé loron bai-bain mós, servisu hamutuk ho banku ka fó formuláriu ba ami atu bele halo esplikasaun ba komunidade, hadi'a sistema trata dokumentu. Informasaun adisionál; balun sistema bee iha lebmetan hetan ajudu husi WaterAid ne'e tanba jestaun di’ak. 

Diretóra Ezekutiva GFFTL Sra.Esmenia Laura Ximenes iha ninia intervensaun selebrasaun Loron Internasionál Feto hahú iha Sékulu XX, komesa iha Estadus Unidus Amérika no Europa, nu’udar rekoñesimentu ba feto sira nia partisipasaun iha área ekonómia, polítika no sosiál. Istória ba selebrasaun loron ne’e, hahú ho asaun protesta ida ne’ebé halo iha Sidade Nova Yorke iha Estadus Unidus Amérika iha 08 Marsu 1857, ba feto sira ne’ebe hetan mal tratadu iha sira nia servisu fatin, tanba krize finanseiru. Loron ne’e mos nu’udar loron hodi hanoin fali dezastre ai-han iha fábrika ho naran Triangle Shirtwaist ne’ebe halakon feto na’in 140 iha Sidade Nova Yorke. Kada tinan iha loron 08 Marsu Nasaun hotu iha mundu selebra loron ida ne’e hanesan Loron Internasional Feto, inklui Timor-Leste.

Iha tinan ida ne’e Grupu Feto Foinsa’e Timor Leste (GFFTL) nu’udar organizasaun Feto ne'ebé mai husi movimentu Feto iha Dewan Solidaritas Mahasiswa Timor-Timur ne'ebé apoiu mane sira hodi luta ba independénsia no hanesan mos membru fundador Rede Feto Timor-Leste ne’ebe Luta no promove direitu feto nian iha Timor-Leste konsidera loron ida ne’e hanesan loron importante ida hodi hanoin hikas sofrementu no kontribuisaun feto sira nian ne’ebé dala barak públiku la tau iha konsiderasaun.

GFFTL dadaun ne'e  servisu parseria ho organizasaun internasionál WaterAid iha Timor-Leste liu husi implementasaun programa “Mellora Estratéjia Advokásia Hodi Garante Integrasaun Igualdade Jéneru, Defisiénsia, Inkluzaun Sosiál, no Mudansa Klimátika iha Dezenvolvimentu setór BESI ne'ebé Inkluzivu no Sustentável” koopera hamutuk ho Governu Munisípiu liu husi Pontu Fokál Sekretária Estadu ba Igualdade (SEI) no Asaun Sosiál Munisípiu Liquiça hodi kria planu hamutuk ba organiza selebrasaun Loron Internasionál Feto ba tinan ida ne’e hodi fó rekoñesimentu ba feto nia partisipasaun iha setór oi-oin ne'ebé kontribui ba dezenvolvimentu iha Timor-Leste katak dezenvolvimentu nasaun presiza investe no involve feto iha prosesu dezenvolvimentu tanba feto bele no iha ona progresu barak ne'ebé feto atinje iha kna’ar oioin. Aktividade husi selebrasaun ne’e maka kontinua halo sosializasaun no Deziminasaun informasaun ba komunidade sira kona-ba feto nia partisipasaun iha vida polítika, ekonómia no sosiál iha Timor-Leste.

Liu husi sosializasaun no Deziminasaun informasaun ba komunidade sira hanesan meius ida hodi minimiza interpretasaun sosiedade nian ba kapasidade no abilidade feto sira nian, ne'ebé sempre konsidera feto nia kapasidade mínimu liu kompara ho mane sira, tanba kompriensaun tradisionál sosiedade Timor-Leste nian ne’ebé define Feto sira la iha papél importante atu foti desizaun iha vida sosiál, polítika no ekonómia. Ho ida ne’e konvida parseiru sira husi instituisaun Governu, Sosiedade Sivíl inklui parte igreja atu hamutuk ita luta ba igualdade jéneru iha Timor-Leste hodi redús diskriminasaun oioin hasoru feto sira no asegura prinsipiu ODS katak “Sei la husik ema ida iha kotuk”.