GFFTL-Investe iha Feto Aselera Progresu

Objetivu :

1. Atu dignifika feto nia kontribuisaun iha setór oi-oin iha prosesu dezenvolvimentu nasionál iha Timor-Leste.
2. Atu dezafia no motiva feto maluk sira hodi partisipa ativu no involve a’an iha atividade oi-oin iha Suku Fatumasi hodi hakle’an sira nia koñesimentu iha área oioin.
3. Atu hasa’e konsiensia komunidade sira kona-ba asuntu igualdade jéneru no direitus umanus hodi redús diskriminasaun sira hasoru feto iha família no sosiedade.
4. Atu komunidade bele hatene kona-ba oinsá refere ka hato’o kazu bainhira sira hetan no hare violénsia akontese.
5. Motiva pesoál, família, no komunidade hodi halo mudansa ba hahalok hasoru feto no labarik feto sira, atu labele limite abilidade hodi kontribui ba dezenvolvimentu iha Suku, Postu, Munisípiu no ba nasaun.

Husi Tema Mundiál ba tinan ida nee fó hanoin mai ita kata feto bele no feto mós bele asum ikargu balun. Agora dadun ita hetan feto ne’ebé bele lidera iha Parlamentu Nasionál ne’e hatudu katak feto bele no feto iha kapasidade, ho tema ne’e bele aselera ba dezenvovimentu rai ida ne’e.

Reprezentante Jestor Programa WaterAid Munisípiu Liquiça Ofisial GEDSI Antoneta iha ninia intervensaun hakarak agradese no fó obrigada ba GFFTL no SEI hodi identifika ona fatin sira neébe mak seidauk halo selebrasaun no sosializa informasaun sira ba.

Pensamentu todan ida neébe mak susar atu muda mak ita ema nia konsiénsia. WaterAid nia prezensa iha Munisípiu foka liu ba BESI oinsá harii sistema iha bee iha área rurál, intervensaun sira iha Eskola no postu saúde sira. Igualdade Jéneru Defisiénsia no Inkluzaun Sosiál hanesan atividade ne’ebé importante tebes iha atividade BESI. Husi selebrasaun sira ne'e hanesan fatór importante tebes tanba la’os de’it selebra loron maibé bele mós sosializa informasaun sira. Atividade sira ne'e presiza tebes apoiu husi maluk mane sira tanba bele mós kontribui ba dezenvolvimentu rai ida ne'e.    

SEI nasionál Sra. Olga da C. M. iha ninia intervensaun selebrasaun loron Internasionál feto kada tinan ita selebra iha Dia 8 Marsu, uluk nana’in parabéns ba feto sira hotu iha mundu tomak espesiál feto Timor-Leste.  Sekretária Estadu Igualdade servisu hamutuk ho Governu no sosiedade sivíl oinsá atu promove igualdade jéneru iha sosiedade. Atu promove igualdade jéneru ne'e rasik maka liu husi atividade sira hanesan eventu selebrasaun sira. SEI iha nia programa balun ne'ebé maka fahe ona kada Munisípiu hodi implementa tuir planu Munisípiu nian, husi programa sira ne’e maka oinsá atu motiva feto sira atu hola parte hanesan ho mane sira hanesan hakerek iha konstituisaun katak labele husik ema ida iha kotuk tantu feto inklui ema ho defisiénsia/ka vulneravel sira.

SEI hamriik iha nia prinsipiu mak atu koordena, sosializa, halo advokásia, avaliasaun ba orsamentu jerál Estadu no Planu orsamentu sira ba Igualdade jéneru. Ho objetivu mak investe ba feto, investe ba futuru rai ida ne'e. 

Sra. Olga da Costa Monteiro iha intervensaun hateten katak tema ba loron Internasionál Feto tinan ida-ne’e mak “Investe iha Feto: Aselera Progresu”, katak presiza duni atu investe barak iha feto tanba husi esperiénsia ne’ebé iha hatudu katak feto bele asume responsabilidade iha área saida de’it inklui feto iha Timor-Leste. Xefe-Departamentu ne’e relata hodi refere ba iha lideransa feto Timor-Leste ne’ebé oras ne’e dadaun asume hela knaar iha área oi-oin iha Timor-Leste.

“Iha Timor-Leste, Ita iha lideransa barak mak feto, feto iha na’in 25 ka 38% mak hanesan membru Parlamentu Nasionál inklui Prezidente Parlamentu Nasionál rasik; Feto hanesan membru Governu nain 7 ka 15%, Feto Xefe-Suku na’in 18 ka 4% no Feto Xefe-Aldeia 117 ka 5%. Temporária ita iha Feto na’in 2 ne’ebé okupa kargu hanesan Prezidente Autordade Munisípiu (Ainaro no Baucau) no iha feto balun tan ne’ebé hetan konfiansa hanesan Administradora Postu no kargu xefia sira iha munisípiu”, Xefe-Departamentu Olga Monteiro hateten.

Ita presiza atu haree feto barak liután partisipa iha nivel lideransa iha Timor-Leste, feto iha militár, Seguransa, Dotora, Enjinária, iha sosiedade no iha nivél foti-desizaun sira. Atu investe iha feto tenke investe barak liu iha empoderamentu estratéjia ba ema hotu liuliu ba feto sira iha edukasaun no promove sira iha partisipasau ativu iha dezenvolvimentu nasaun, tanba ne’e tenke rekuñese papél feto iha lideransa iha área oi-oin, nune’e ita bele haree povu Timor-Leste bele moris iha prosperidade no inklusividade iha ita-nia nasaun.

SEI hanesan Institusaun Estadu ne’ebé tau-matan ba iha asuntu promosaun ba igualdade jéneru, iha komitmentu aas atu kontinua servisu maka’as hamutuk ho parseiru dezenvolvimentu sira tantu nasionál no internasionál atu halo advokásia no koordena servisu hodi asegura katak feto no labarik-feto, protadór/ora defisiénsia no komponente vulnerável seluk hetan tratamentu hanesan hodi asesu ba iha setor hotu inklui edukasaun, Saúde, ekonómia, sosiál no selu-seluk tan.

Programa importante sira ne'ebé maka SEI Nasionál aloka ba Munisípiu, implementa tuir isu sira ne'ebé maka relata. SEI Munisípiu direita observa hodi hato’o ba Nasionál, Nasionál sei relata liu ba ita nia governu atu bele tau planu prioridade. No alokasaun orsamentu sira ba iha Gabinete, entaun osan sira ne’e maka sei fila fali mai iha munisipiu. Dalan oinsá maka komunidade sira bele asesu ba orsamentu sira ne’e, entaun liu husi grupu kiik sira ne'ebé maka imi feto sira harii bele hatoó ba Pontu Fokál SEI nian iha postu no Munisípiu atu sira bele apoiu imi liu husi sira nia programa ida naran empoderamentu feto iha vida ekonómia.

Administrador Postu  Bazartete Sr. Miguel dos Santos iha ninia intervensaun apresia ba Organizasaun GFFTL no WaterAid tanba bele organiza no selebra ona eventu iha aldeia Metir. Loron Mundial feto loron importante tebes ba feto sira hotu atu selebra. Parabéns ba feto sira hotu iha mundu tomak.

Hanesan autoridade prontu koopera ho instituisaun hotu tantu husi sosiedade sivíl, tanba Liquiça atu ba oin presiza ita hotu nia luta no servisu hamutuk. liu husi programa sira ne'ebé maka implementa, hanesan oinsá maka ita bele fahe informasaun ba inan feton sira iha area rural atu bele rekoñese loron mundiál feto sai hanesan loron importante. Tanba ne’e parabéns e atu hatoó de’it sujestaun balun katak se bele kada tinan ita halo selebrasaun ne’e rotativa atu nune’e aldeia sira seluk iha area rural bele hat ene loron importante ida nee.

Reprezetante PAM Sr. Zito A. de O. da Costa iha ninia intervensaun hato’o Parabéns ba inan feton sira hotu, atu hato’o de’it katak kada tinan ita selebra loron  Internasionál feto normálmente iha Dia 8 Marsu, maibé duvida uitoan tanba ita la selebra loron mane, tanba saida maka ita la selebra loron mane, tanba violénsia ne’e mosu barak liu feto sira maka hasoru, entaun feto maka sai hanesan fatór importante tan ne'e mak kada tinan ita sempre atu selebra, liu husi selebrasaun sira ne’e maka atu gia feto sira oinsá  maka bele ezizi sira nia direitu , oinsá maka livre husi diskriminasaun sira, entaun liu husi ita bot sira nia partisipasaun iha eventu sira hanesan ohin loron atu bele rona informasaun sira.

Envolvimentu husi Polísia VPU, Diretóra Asaun social, SEI Nasionál sira ne’e importante tebes oinsá ita-boot sira bele koñese tan sira ne’e maka imi sei hasoru bainhira hasoru problema hanesan violénsia doméstika no violénsia sira seluk, sira mak sei atende imi bainhira prosesu kazu sira, no sira maka sei asegura imi oinsá bele lao tuir prosesu jurídiku nian. Parabéns ba ita-boot sira hotu.  Permite hau loke ita nia abertura ba atividade ida nee.