Komunikadu Imprensa Kona-ba OJE-2024 Ba Setór Bee, Saneamentu & Ijiene

Bee hanesan direitu báziku husi povu hodi garante vida moris loron-loron nian ho dignu, ne’ebe hatuur ona iha Konstituisaun RDTL, artigu 6 ko’alia kona-ba objetivu Estadu nian, liu-liu iha versíkulu (e) harii sosiedade ida ne’ebé iha justisa sosiál, hodi hakiak sidadaun sira nia moris di’ak ba isin no klamar. Nune’e mós Governu trasa ona meta PEDN 2011-2030 povu iha territóriu Timor-Leste laran tomak asesu ona Bee moos no Saneamentu ne’ebe adekuadu, sustentável no inkluzivu. Aleinde ne’e Dekretu lei númeru 4/2004 kona-ba abastesimentu bee ba konsumu públiku, Dekretu Lei númeru 31/2020 kona-ba kontrolu kualidade ba konsumu nian, polítika nasionál saneamentu báziku, polítika nasionál abastesimentu agua 2020 no polítika jestaun rekursu bee.

Iha Polítika no Programa IX Governu nian ne’ebe konsidera Setór Bee no Saneamentu nu’udar setór vital ba programa tinan 5 nian, ne’ebe sita ona iha Programa Governu nian 3.3 hateten, Investimentu ba asesu Bee moos no Saneamentu Báziku labele adia (ka dada) tan. Laiha infrastrutura ida ne’e mak sei afeta ba saúde públika ka hada’et moras, mate no dezenvolvimentu la di’ak ba labarik sira.

1. Situasaun Atual Bee, Saneamentu no Ijiene (BESI) iha Timor-Leste

• Tuir rezultadu husi Sensus 2022 Uma kain ne’ebe asesu ba Torneira Publiku hamutuk 39.5%, Uma kain ne’ebe Torneira instala iha uma laran 10.2% no Uma kain ne’ebe kontinua utiliza ou asesu ba Mota, Bee Matan, Lagoa, Kollam no Irrigasaun hodi utiliza ba nesesidade Loron-loron nian hamutuk 8.7% no Koleta Udan Been 0.2%. Iha sensus 2022 hatudu katak kuaze uma kain besik 70% mak asesu ona ba bee tantu torneira públiku, kanalizasaun bee ba uma, uma oin no bee posu. Sei hela uma kain balun mak sei depende ba udan been, sosa, kuru bee iha mota no lagoa no kuru iha bee matan direta.

• Rezultadu deskobrementu husi Membru sira (HAK) periodu Marsu 2022- Jullu 2023 ba kondisaun asesu bee komunidade iha Munisipiu 6 (Baucau, Viqueque, Aileu, Ainaro, Dili & Ermera), ho Suku 56, aldeia 338, total populasaun 308,213 no mós total uma kain 66,363. “Klasifika uma kain ne’ebé asesu kanalizasaun total 46,210, uma kain ne’ebe asesu bee matan totál 9,849 no uma kain ne’ebé asesu bee posu totál 10,304”. Klasifika ba pursentu asesu kanalizasaun 69,63 %, asesu bee matan 14, 84 % no asesu bee posu 15, 53 %.

• Fornesimentu Bee no Sanemanetu iha Postu Saude. Dadus Husi GFFTL neébe halo auditoria sosiál iha Munisipiu Baucau ba servisu públiku sira no fasilidade postu saúde liu husi Ministériu Saúde iha Timor-Leste rezultadu hatudu katak: BESI husi postu saúde 27 inklui hospital Referral 1 avalia katak : Asesu Bee Baziku 7 (25%), Limitasaun 15 (53,6%) no Laiha Fornesimentu 6 (21,40%). Saneamentu Baziku 2 (7,14%), Limitasaun 23 (82,14%) no Laiha Service 3 (10,71%).

• Ezisténsia GMF (Munisipiu Liquiça no Manufahi) . Munisipiu Manufahi (F-LBF); Sistema hamutuk 200, GMF iha no Funsiona (89), GMF la Funsiona (24) no Laiha GMF (87). Munisipiu Liquiçá (FHTL); Postu Liquiça Vila GMF 80, Maubara 96 no Bazartete 33. Maske nune’e funsionamentu GMF sai hanesan ameasa boot ba sustentabilidade GMF no sistema sira tanba Sira servisu ne’ebe sein insentivu ou voluntáriu no fatór seluk ne’ebe fo impedimentu maka komunidade seidauk sente sai nain ba sistema ne’ebe kada tinan operasaun ba sistema hahú makaás no halo kobransa ba fundus Operasaun no Manutensaun.

Fontes ; Lao Hamutuk 

Link ; https://www.laohamutuk.org/econ/OGE24/23OGE24.htm