POLÍTIKA JESTAUN BEE NO MÓS INTEGRASAUN BA POLÍTIKA MUDANSA KLIMÁTIKA LIGA BA DEZENVOLVIMENTU SETÓR BEE NO SANEAMENTU IHA TIMOR-LESTE

Iha intervensaun husi Prezidente Konsellu Fiskál PN-BESI-TL hateten Plataforma Nasionál Bee, Saneamentu no Ijiene Timor-Leste estabelese atu hola papél iha servisu advokasia no asegura partisipasaun ONG sira nian hodi tau matan ba polítika no prosesu dezenvolvimentu setór Bee, Saneamentu no Ijiene iha Timor-Leste, atu nune’e bele atinji metas boot 2030 nian katak Povu hotu asesu ba bee ne’ebe adekuadu, Saneamentu no Ijiene ne’ebe mak sustentável no inkluzivu. Nia hatutan, hafoin Governu trasa tiha Planu Estratéjiku ba Dezenvolvimentu Nasionál ba 2030 nian, iha mós Polítika no Dekretu Lei ou Enkuadramentu Legal oioin atu haforsa liu tan ba atinjimentu dezenvolvimentu setór Bee, Saneamentu no Ijiene, liu-liu dekretu lei kona-ba Abastesimentu Bee ba Konsumu Públiku, Kontrolu Kualidade bee ba Konsumu Umanu, nune’e mós Rezolusaun sira ba Polítika Nasionál ba Alterasaun Klimátika no Jestaun Rekursu Hidriku nian, Liu husi ida ne’e mak Oinsá atu kontribui ba haforsa melloramentu dezenvolvimentu setór Bee, Saneamentu no Ijiene iha Timor-Leste.

Iha fatin hanesan, Reprezentante Country Diretór WaterAid hateten aspetu jestaun rekursu bee hanesan aspetu ida mak importante iha Timor-Leste no importante mós ba ema hotu atu tau atensaun ba setór ida ne’e. Nia salienta, WaterAid ne’ebe hanesan NGO internasionál iha komitmentu boot atu apoiu Jestaun Rekursu Bee liu-liu polítika, mata dalan no estratejia sira mak bele ajuda implementasaun jestaun rekursu bee iha ita-nia rain, atu oinsa polítika no mata dalan sira bele integradu didi’ak iha Planu entidade relevante sira hodi implementa to’o ba iha komunidade sira. WaterAid mós iha ninia prioridade ne’ebe tau ona iha planu estratéjiku kona-ba asuntu mudansa klimátika ne’ebe refleta mós ba iha jestaun rekursu bee, hodi garante kualidade bee mak fornese ba komunidade sira hodi konsumu no la prejudika ba sira-nia saúde.

WaterAid mós kontinua apoiu organizasaun parseiru sira inklui PN-BESI-TL hodi halo revizaun ba polítika no mata dalan sira no mós hamutuk ho sosiedade sivil hodi apoiu sira-nia planu estratéjiku advokasia nian oinsa atu tau matan ba asuntu sira hanesan ne’e, liu-liu atu foti lian husi komunidade sira nian hodi garante sira-nia asesu ba bee ne’ebe seguru no sustentável.

 Nia hatutan, WaterAid mós iha komitmentu ho DNRAS atu fornese Kapasitasaun ruma ligadu ho Bee, Saneamentu no Ijiene liu-liu ba iha Jestaun Rekursu Bee ba Funsionáriu DNRAS nian, iha Kapasitasaun ida ne’e sei ko’alia kona-ba Jestaun dadus, Apoiu Planeamentu, Sistema Monitórizasaun no implementasaun sira iha komunidade.

 Entretantu, Diretór Nasionál Regulasaun Água e Saneamentu (DNRAS) iha nia intervensaun no abertura hateten katak, Bee no Saneamentu sai problema boot ida, desde I Governu Konstitusional ita seidauk konsege rezolve atu mellora sistema Bee no Saneamentu ba komunidade sira, tanba ita-nia lei halo tiha ona maibe la sosializa, la implementa ho di’ak no laiha jestaun di’ak ba abastesimentu. Tanba ne’e mak DNRAS iha hanoin ida atu servisu hamutuk ho parseiru sira hodi fo hanoin ba governu kona-ba oinsa bele rezolve problema sira ne’e.

Iha workshop ne’e mós,Diresaun Nasionál ba Regulasaun Bee no Saneamentu nian ( DNGRAS), liu-husi ninia equipa-sira, halo aprezentasaun kona-bá Polítika Nacional kona-bá Jestaun Rekursu bee nian. Iha aprezentasaun ne’e, DNRAS-nia equipa aprezenta katak: Governu Timor-leste Liu -husi Rezolusaun Governo N.0 42/2020, de 23 de Outubro. Aprova ona Polítika Nacional ida kona-bá Jestaun rekursu bee hotu-hotu iha teritório Timor-Leste tomak. No Polítika ne’e sei sai nudar Documentu orientasaun no informasaun ba autoridade públika, jestór rekursu bee no entidade hotu ne'ebé partisipa iha dezenvolvimentu no implementasaun ba lejizlasaun, regulamentu, polítika, estratéjia, planu no aksaun ba jestaun rekursu bee iha teritóriu nasional Timor-Leste tomak.

Ligadu ho workshop ida ne’e, Bee dezempeña nia papél ida krusiál tebes iha reziliénsia klimátika no mitigasaun ba mudansa klimátika. Ita tenke hadi’a armzenamentu karbonu ho ekosistema akuátika, proteje zona naturál sira, kaptasaun udan-been, adota kultura intelijénsia relasaun ho klima, re-utilizasaun bee reziduál sira, aproveitamentu bee rai-okos. Bee rai-okos sai ameasa boot ida ba kapitál Dili, iha ne’ebe agora dadaun perfurasaun bee atinji ona 2000 e tal iha kapitál Dili ne’ebe fura husi BTL.EP, komunidade sira, ema estranjeiru sira no ema balun mós fura hodi faan fila-fali (Empreza riu).

Tanba ne’e mak DNRAS prepara ona ezbosu Lei ba jestaun rekursu bee, hafoin lori ba Ministru no Sekretáriu Estadu hodi hato’o ba Konsellu Ministru atu hetan aprovasaun, atu bele asegura ita miniza perfurasaun bee rai-okos iha kapitál Dili.

Iha atividade Workshop ida ne’e, iha mós aprezentasaun husi Diresaun Nasionál Regulasaun Agua e Saneamentu kona-bá Polítika Nasionál Jestaun Bee no mós Integrasaun ba Polítika Mudansa Klimátika liga ba setór Bee no Saneamentu, iha mós sesaun diskusaun ne’ebe la’o ho di’ak tebes.

Partisipa iha workshop ida ne’e mak Diretór Nasionál Regulasaun Bee no Saneamentu ho nia ekipa, BTL.EP, SE-PNDS, CVTL, Xefe Suku Comoro, La’o Hamutuk, WATL, Plan International, Mary Mackillop Today, Similie, CODIVA, F-HTL, GFFTL, Feto Enjeñeira, ETADEP, RHTO, Asosiasaun HAK no PN-BESI-TL.

Atividade refere realiza iha Salaun Assosiasaun HAK no hetan suporta husi WaterAid Timor-Leste