GFFTL ho Parseiru sira Realiza Diálogu Nivel Munisipál Kona-ba Bee, Saneamentu no Ijiene

Xefe Gabinete, Sra. Cesaltina M. J do Rego, reprezenta S.E PAM Baucau, abertura semináriu Esforsu Sira Kona-ba Investimentu no Servisu Integradu iha Be’e Saneamentu no Ijiene (BESI) Ne’ebé Resiliente no Inkluzivu, ne’ebé organiza husi Grupu Feto Foinsa’e Timor Lorosa’e (GFFTL), atividade ne’e realiza iha salaun Apuramentu Munisipál Baucau. Diretóra ezekutivu Organizasaun GFFTL Esmenia Laura Ximenes hateten, objetivu diálogu ne'e atu partilla informasaun ba autoridade Lokál sira, tanba setór bee saneamentu no ijiene hanesan direitus humanu no báziku, tanba ne'e kontinua haforsa polítika no estratéjia atu mellora no dezenvolve setór BESI iha munisípiu sira. Liu husi identifikasaun, munisípiu Baucau kuaze maioria ho rekursu bee ne'ebé volume maka'as maibé to'o dadaun komunidade kontinua halerik ba bee moos, nune'e presiza tau atensaun atu fornese bee ba komunidade tanbá setór bee no saneamentu sai direitu humanu no báziku.

Iha ámbitu ne'e mos Diretóra GFFTL, akresenta elementu ba dezenvolvimentu ba iha rai laran maka asesu ba bee moos, saneamentu ne’ebé adekuadu seguru asesivel ba ema hotu, “Ita nia governu trasa ona planu estratéjia dezenvolvimentu nasionál, husi tinan 2011-2030, ne’ebé obta ba ita nia objetivu dezenvolvimentu sustentabilidade, katak povu iha territóriu laran tomak asesu ona ba setór bee moos ne’ebé adekuadu saneamentu no ijiene ne’ebé inkluzivu”. Diretóra real sá tan katak; “atu garante servisu ne’ebé efikasia husi Governu hodi garante sustentabilidade hodi implementa maka papél ita hotu nian importante tebes tanba atu kontrolu hodi promove partisipasaun sidadaun sira hodi alerta katak bee mos saneamentu no ijiene importante hodi labele haketak husi sidadaun ida nia moris”.

Tempu hanesan Xefe Gabinete, Sra. Cesaltina M. J do Rego, reprezenta S.E PAM Baucau iha nia intervensaun hateten katak; “Sorumutu ida ne'e interesante los tanba koalia konabá BESI ida ne'e esensiál tebe-tebes ba kada pesoál nia moris tanba ne'e mai hau importante tebes tanbá Munisipiu Manufahi no Liquiça mós mai fahe lisaun di'ak sira ne'e mai iha Munisipiu Baucau. Lisaun mak ami foti ka aprende husi esperiénsia sira mak Munisipiu Manufahi no Munisipiu Liquiça fahe hanesan rezultadu di'ak sira ne'ebé munisípiu rua atinje ona ami bele implementa iha munisípiu Baucau maske iha obstákulu balun tanba Liquiça no Manufahi nia área ka rai la hanesan ho Baucau, ho ida ne'e lisaun di'ak sira ne'ebé hetan ami iha ona imajen ka imajinasaun atu implementa iha Baucau. Pratika di'ak sira ne'ebé partisipantes hotu-hotu ne'ebé hetan hosi Sorumutu ne'e liu husi Burner, Pamfletu, no aprezentasaun sira ne'ebé aprezenta ka hatudu fiar katak partisipantes sira ne'ebé partisipa liu-liu Xefe Suku sira, Diretóra SMASA Baucau, PNTL bele foti hanesan pontu referénsia ba sira nia kna’ar servisu hodi bele implementa iha Munisípiu Baucau liu-liu kona-ba tools ka indikadór ne'ebé iha atu hodi halo prosesu diskusaun ka avaliasaun ba KPK ne'e rasik bele ajuda tebes hodi implementa prosesu KPK tuir kada sistema sira ne'ebé estabelese ona iha Munisípiu Baucau hodi hadi’a no mellora liu tan fornesimentu ka distribuisaun bee ba komunidade ho adekuadu no inkluzivu tanba utiliza indikadór sira ne'e hanesan mata-dalan ne'ebé atu utiliza iha prosesu avaliasaun ba sistema sira liu husi KPK nian. Ikus husi Sorumutu ne'e reprezentante S.E PAM Baucau hato'o katak Sorumutu ne'e di'ak tebes ho nune’e Sorumutu sira ne'e pelumenus bele hala’o fila fali atu bele halo kombinasaun hodi eziste nafatin atu nuneé bele refresh ema nian ida-idak nia hanoin, servidor sira nia hanoin hodi bele implementa programa BESI ho adekuadu hodi hatán ba komunidade sira nia Nesesidade.

Atividade ne’e partisipa husi Prezidente Autoridade Munisipál Liquiça, Diretores Servisu Munisipais Baucau, Liquiça, Manufahi, Delegasaun Territorial, PNTL, CNCLN-Baucau, Parseiru Dezenvolvimentu, WaterAid, Assosiasaun HAK, PN-BESI-TL no ONG sira iha Munisípiu Baucau Administradór Postu Administrativu, funsionáriu, Xefe Suku inklui komunidade benefisiariu no GMF.