Mudansa Klimátika iha Manufahi
Workshop Perfíl Perigu Mudansa Klimátika Manufahi iha salaun enkontru administrasaun munisipál.
Iha loron 20 de Novembru, ekipa WaterAid ho kooperasaun servisu entre Administrasaun Munisípiu Manufahi, SMASA Manufahi no parseiru Luta ba Futuru realiza ona Workshop Perfíl Perigu Mudansa Klimátika Manufahi iha salaun enkontru administrasaun munisipál.
Atividade ne’e hala’o ho objetivu prinsipál sira hanesan atu diskute no dezenvolve perfíl perigu klimátika liga ba iha komponente xave perigu klimátika ne'ebé mak afeta servisu BESI no jestaun rekursu bee, dokumenta Frekuénsia, Intensidade, no impaktu husi perigu klimátika, fornese perfíl BESI nian ba autór Governu sira, no hafahe informasaun kona-ba perfíl perigu mudansa klimátika ba lideransa komunitáriu no instituisaun relevante sira atu nune’e bele sai referénsia ba aproximasaun programa iha tempu oin mai hanesan programa bee ba feto ho perspetiva mitigasaun ba Mudansa klimátika.
Workshop ne’e loke ho intervensaun husi Diretór SMASA Manufahi, Jestór Programa WaterAid Timor-Leste, Komandante Distritál, no Prezidente Autoridade Munisípiu Manufahi. Tuir mai, iha sasin husi Komandante APC, Diretór SMASA, no Xefi Suku Daisua kona-ba situasaun kontestuál. Hafoin ida ne’e, iha aprezentasaun husi Diretóra Sentru Edukasaun Informasaun Ambientál kona-ba situasaun klima iha Manufahi no WaterAid nia Konsultan ne’ebé aprezenta kona-ba perfíl perigu klimátika no kontinua ba diskusaun no aprezentasaun grupu uza métodu world cafe tuir kada kategoria perigu mudansa klimátika hanesan meteorolójiku, klimatolójiku, ídrolójiku, geofízika, no biolójiku.
Husi workshop ne’e nia prosesu tomak ekipa hamutuk ho partisipante husi setór xave husi Governu, delegasaun territorial, autoridade komunitáriu, autoridade munisipiu, ONG no ajénsia internasionál konsege kompleta ona informasaun ba formatu perfíl perigu mudansa klimátika. Atividade ida ne’e mós hatudu katak tipu lima husi perigu mudansa klimátika no nia sub-tipu barak maka komesa akontese ona iha munisipiu Manufahi durante tinan lima ne’e nia laran sira hanesan temperatura manas, rai monu, akontesimentu dezastre naturais ne’ebé halo munisipiu Manufahi deklara kalamidade no fó impaktu ba setór BESI no estragus ba infrastrutura, plantasaun inklui fó ameasa ba ema nia vida.