Estudu Kazu Puquelete: Lideransa Feto iha BESI Rural

Señora Rosa Soares, idade 44, nudár xefe GMF sistema bee Lualisa, Suku Gugleur, Postu administrativu Maubara, Munisipiu Liquiçá. Señora Rosa lidera GMF nee hahú husi tinan 2016 to’o agora.

Hanesan lideransa másimu ba GMF sistema bee Lualisa nian, señora Rosa hanesan mós xefe família hodi tau matan ba oan sira hamutuk na’in lima (5), balun sei hala’o sira nia estudu no balun harii ona família. Oan sira suporta tebes ba servisu ne’ebé señora Rosa hala’o nudár xefe GMF nian. Atividade diária señora Rosa nian mak hanesan knaar-liman (handicraft) hodi homan kohe, kretik, telfone fatin, nst. Hodi fan atu bele iha rendimentu ba suporta nesesidade família nian. No husi rendimentu nee bele mós uza ba halo kontribuisaun ba fundus sistema bee Lualisa nian rutina kada fulan.  

“………….… ha’u sai Xefe GMF nee tanba fiar husi komunidade, no hili ha’u liu husi enkontru nudár xefe GMF…………………... komunidade mak hili ha’u, entaun ha’u koalia tenke rona no fiar ha’u”. Dehan husi señora Rosa.

Nudár xefe GMF knaar no responsabilidade mak organiza enkontru ho komunidade hamutuk ho xefe aldeia, delegada no delegadu sira. Knaar seluk mak organiza komunidade hodi fahe servisu ba komunidade, hahú kedas husi konstrui sistema bee nee too komunidade asesu ba bee. Organiza komunidade servisu hamutuk hodi tau matan ba bee-matan, hanesan hamoos bee-matan, hamoos tahu ne’ebé tama iha tanke, hadi’a kanu nst. Sempre fó hanoin mós ba komunidade nee, hodi bele halo kontribuisaun ba fundus sistema bee nee ninian kada fulan. Husi kontribuisaun fundus nee, fulan-fulan koordenadór torneira públiku mak responsabiliza hodi koleta husi família sira ne’ebé uza bee torneira públiku hafoin koordenadór torneira públiku entrega ba Tezoreiru GMF hodi prepara relatóriu ba enkontru trimestral membru GMF.

Sistema bee Lualisa hahú instala iha tinan 2016 no iha tinan nee duni finaliza konstrusaun no entrega ba komunidade hodi lidera totálmente ba halo O&M nune’e fornesimentu bee ba komunidade bele iha ninia kontinuidade.

Iha tinan 2016 to’o 2021 komunidade hahú halo kontribuisaun kada fulan ba família ida ho montante dolar amerikanu ida ($1.00), deside tarefa nee liu husi enkontru komunidade aliña mós ho matadalan governu Timor-Leste ba fornesimentu bee rural nian sobre kontribuisaun komunidade porsentu sanulu (10%) husi kustu projetu nune’e GMF bele iha fundus nato’on ba O&M, husi kontribuisaun osan durante tinan 4 osan hamutuk dollar amerikanu rihun ida atus hat ($1,400.00), uainhira kontribuisaun responde ona 10% kontribuisaun hamenus fali ba centavos lima nulu ($0.50) tuir kbiit komunidade no montante refere sei mantein ba kontribuisaun fundus O&M permanente.

Husi osan fundus ne’ebé iha komunidade konsege responde hodi halo manutensaun ba sistema Lualisa uainhira hetan inundasaun no sistema bee hetan estragus maka’as.

Iha mós enkontru entre Membru GMF sira, ne’ebé realiza kada fulan 3, hodi ko’alia kona-ba progresu no dezafiu ruma mak akontese iha sistema bee nee no rona mós dezafiu ruma husi koordenadór kada torneira nian. Iha enkontru nee ko’alia mós kona-ba fundus kontribuisaun husi komunidade mak asesu ona ba sistema bee nee, no komunidade hotu ativu tebes ba halo kontribuisaun kada fulan. No komunidade mós sempre voluntáriu kontribui ba konsumu ka ai-han sira kuandu realiza enkontru iha nivel komunidade.

Aleinde enkontru trimestral nian ba membru GMF realiza mós enkontru kada fulan neen ba komunidade, no iha mós enkontru estraordináriu ho GMF no lideransa komunitária uainhira iha dezastre ruma ne’ebé mak afeta ba bee-matan, hodi nune’e bele foti kedas asaun ba rezolve estragus ne’ebé iha.

Sistema bee Lualisa nee, hamutuk iha torneira sia (9), no asesu husi uma-kain 43. Kada torneira ida (1) asesu husi uma-kain 3 ou 4. “…………. ha’u hasai fali idea ida oinsá mak uma-kain hotu bele hetan hotu bee iha kada loron, ha’u bolu koordenadór torneira ami foti masa, tau masa iha torneira depois halo kuak tuir total uma-kain ne’ebé iha, tau mangeira no liga ba kada uma-kain, no ida nee fasil ba ema hotu inklui ema ho defisiénsia atu asesu ba bee, tanba bee ne’ebé uza nee tuir oras”. Dehan husi señora Rosa.

Komunidade asesu ba bee nee tuir oras, hanesan bee loke iha tuku 6 dadeer no sei taka iha tuku 6 loraik. Atu nune’e bele enxe fali bee ba tanke boot iha tempu kalan, hodi nune’e bele kontinua distribui fali ba komunidade iha loron tuir mai nian.

Nudár xefe GMF, dezafiu balun ne’ebé hasoru mak, kuandu iha problema ruma ka fallansu ruma ba sistema bee nee, komunidade sempre ba buka uluk mak xefe GMF. Nudár xefe GMF, sempre fó resposta ho di’ak de’it, hodi dehan tenke kalma no komunidade hotu presiza tur hamutuk hodi bele rezolve. Tanba servisu iha GMF nee mós hanesan servisu voluntáriu.

Husi esforsu lubuk mak señora Rosa nudár xefe GMF no nia estrutura hotu halo ona hodi jere ho di’ak tebes ba sistema bee Lualisa nee nian. No iha mós kolaborasaun servisu ne’ebé mak di’ak tebes ho komunidade, ho ida nee hanesan xefe GMF iha ona mós hanoin inovativu balun hodi hakarak halo mudansa ruma iha komunidade nee, liu husi uza bee ne’ebé mak iha, planu hela atu kuda modo iha komunidade nee.  “……………….. modo nee bele han, no balun lori ba fan, no ida fan nian nee osan balun bele uza hodi tau ba iha kontribuisaun kada fulan nian’’. Dehan husi señora Rosa.

Señora Rosa iha mehi hakarak sai nudár xefe aldeia.