Haforsa Setor Bee, Saneamentu no Ijiene (BESI), Nomos Ekuidade no Inkluzaun iha BESI
Avaliasaun Haforsa Setór hanesan enkontru ida hodi halo diskusaun entre setór sira hotu ne’ebé servisu ba iha Bee, Saneamentu, Ijiene (BESI) no igualdade jéneru, defisiénsia, no inkluzaun sosiál (IJDIS) iha BESI. Avaliasaun ida ne’e halo hodi haree fila fali servisu sira ne’ebé mak halo tiha ona, fahe esperiénsia hodi haree setór BESI nia progresu to’o ona iha ne’ebé no haree mós oinsá integrasaun jéneru, defisiénsia, no inkluzaun sosiál iha setór BESI.
WaterAid/Alibaba
Tinan ida ne’e avaliasaun setór ida ne’e hala’o de’it iha nivel munisípiu, iha munisípiu Liquiçá no Manufahi hodi haree ba servisu BESI no integrasaun jéneru, defisiénsia, no inkluzaun sosiál iha BESI iha munisípiu rua ne’e. Avaliasaun ida ne’e halo ho workshop loron ida ho balun hodi diskute ka haree fali situasaun setór BESI nian tuir bloku sira hanesan koordenasaun, planu estratéjiku, finansiamentu, arranju institusionál, fornesimentu servisu, akuntabilidade, monitorizasaun no meiu ambiente. Iha bloku ida-idak iha ninia komponente keta-ketak no husi komponente sira ne’e iha mós komponente ida ka rua kona-ba integrasaun jéneru, defisiénsia, no inkluzaun sosiál iha BESI ba bloku haforsa setór ida-idak. Iha avaliasaun ba bloku haforsa setór sira, partisipante sira fó valór ka indika komponente iha bloku sira to’o ona iha faze ida ne’ebé, no faze sira mak hanesan, fraku, tranzisaun, forte no ideal.
