PN-BESI-TL HUSU BA IX GOVERNU ATU INVESTE BA SETÓR BESI LIUHUSI OJE-2025 MÍNIMU PURVOLTA 3%

Bee hanesan direitu báziku husi povu hodi garante vida moris loron-loron nian ho dignu, ne’ebe hatuur ona iha Konstituisaun RDTL, artigu 6 ko’alia kona-ba objetivu Estadu nian, liu-liu iha versíkulu (e) harii sosiedade ida ne’ebé iha justisa sosiál, hodi hakiak sidadaun sira nia moris di’ak ba isin no klamar. Nune’e mós Governu trasa ona meta PEDN 2011-2030 povu iha territóriu Timor-Leste laran tomak asesu ona Bee moos no Saneamentu ne’ebe adekuadu, sustentável no inkluzivu. Aleinde ne’e Dekretu lei númeru 4/2004 kona-ba abastesimentu bee ba konsumu públiku, Dekretu Lei númeru 31/2020 kona-ba kontrolu kualidade ba konsumu nian, polítika nasionál saneamentu báziku, polítika nasionál abastesimentu agua 2020 no polítika jestaun rekursu bee.

Iha Polítika no Programa IX Governu nian ne’ebe konsidera Setór Bee no Saneamentu nu’udar setór vital ba programa tinan 5 nian, ne’ebe sita ona iha Programa Governu nian 3.3 hateten, Investimentu ba asesu Bee moos no Saneamentu Báziku labele adia (ka dada) tan. Laiha infrastrutura ida ne’e mak sei afeta ba saúde públika ka hada’et moras, mate no dezenvolvimentu la di’ak ba labarik sira.

1. Situasaun Atual Bee, Saneamentu no Ijiene (BESI) iha Timor-Leste

• Tuir Dadus Husi Sensus Tinan 2022

Tuir rezultadu husi Sensus 2022 Uma kain ne’ebe asesu ba Torneira Publiku hamutuk 39.5%, Uma kain ne’ebe Torneira instala iha uma laran 10.2% no Uma kain ne’ebe kontinua utiliza ou asesu ba Mota, Bee Matan, Lagoa, Kollam no Irrigasaun hodi utiliza ba nesesidade Loron-loron nian hamutuk 8.7% no Koleta Udan Been 0.2%.

• Dadus no Deskobrementu Sira Husi Membru no Parseiru

Rezultadu Auditoria Sosiál ne’ebé PN-BESI-TL Hala’o iha tinan 2023 hatudu;

Postu Administrativu Tilomar iha Suku Haat (4) no Aldeia hamutuk 23 ho total uma kain 2205 no populasaun 9650 ema. Suku Maudemu iha Aldeia 7, Total Uma Kain 670 no Total populasaun hamutuk 2980 ema, total sistema hamutuk 9 maibé avaria/aat hotu ona signifika la funsiona. Suku CasaBauc iha Aldeia 3, total Uma Kain 492 no total populasaun hamutuk 2147 ema, iha sistema Bee hamutuk 8 no kondisaun di’ak hotu. Suku Lalawa iha Aldeia 6, total Uma Kain 423 no total populasaun hamutuk 1756 ema, sistema bee hamutuk 5 ho kondisaun di’ak hotu. Suku Beiseuc iha aldeia 7, total Uma Kain 620 no total populasaun hamutuk 2767 ema, iha sistema bee 1 ho kondisaun aat. Husi rezultadu auditoria mós hatudu katak, Postu Administrativu Tilomar (Covalima) laiha Funsionáriu Postu Administrativu (FPA) ne’ebé atu monitoriza sistema bee sira iha Postu Administrativu refere, Grupu Maneja Fasilidade kuaze la funsiona iha sistema sira, kualidade bee sei sai preokupasaun ba komunidade sira, rekursu bee menus iha tempu bailoro inklui sistema sira laiha asesibilidade (inkluzaun).

Rezultadu monitorizasaun husi Asosiasaun HAK iha Tinan 2023 ba iha Suku 56, Aldeia hamutuk 338 ho Totál Populasaun 308,213, Uma Kain hamutuk 66,363, Mane hamutuk 156,250 no Feto hamutuk 151,963. Husi rezultadu refere hatudu, Uma Kain ne’ebé asesu ba kanalizasaun ho totál 46,210 (70%), Uma Kain ne’ebé asesu ba bee matan ho totál 9,849 (15%) no Uma Kain ne’ebé asesu ba bee posu ho totál 10,304 (15%).

Dadus Auditoria Sosiál Husi Organizasaun Grupu Feto Foin Sa’e Timor-Leste (GFFTL) tinan 2023, iha Munisipiu Baucau ba servisu públiku sira no fasilidade postu saúde liu-liu liga ba Bee, Saneamentu no Ijiene (BESI) iha postu saúde 27 inklui hospital Referral 1 hatudu katak, Fasilidade Saúde sira iha kategoria Báziku; Bee (25%), Saneamentu (7.14%), Ijiene (0%), Jestaun Lixu (0%) no Limpeza Ambiente (0%). Kategoria Limitasaun; Bee (53.6%), Saneamentu (82.14%), Ijiene (78.60%), Jestaun Lixu (53.60%), Limpeza Ambiente (14.30%). Kategoria No Service; Bee (21.40%), Saneamentu (10.71%), Ijiene (21.40%), Jestaun Lixu (46.40%) no Limpeza Jerál (85.70%).

I. Analiza Kritiku no Deskobrementu Sira ;

• Aspetu Mudansa Klimátika

Timor-Leste mós sai hanesan nasaun ne’ebé vulneravel tebes ba impaktu husi mudansa klimátika ne’ebé liu husi estudu relata katak 55% husi suku sira iha Timor laran hetan ameasa husi temperatura aás, Inundasaun, rai monu, Inundasaun costerie iha tasi (Climate Finance Initiative, WaterAid Timor-Leste, 2016). Timor-Leste mós dadaun ne’e nia temperature manas tebes no tinan-tinan sa’e 36 to’o 39 0c, liu-liu iha fulan setembru no Outubru. Ita hare mudansa entre Ai-Horis no Ai laran tuan tanba tinan-tinan ita tesi ai no sunu rai arbiru ai horis komesa menus ba dadaun, entaun nia impaktu mak akontese bailoro naruk no sei afeta mós ba rekursu bee iha Bee matan sira hahú maran no menus ba dadaun 

• Aspetu Ekonomia ;

Tuir dadus husi Timor-Leste Survey of Living Standards Nivel kiak kontinua aumenta ba 41.8%. populasaun nasionál moris iha liña kiak nia okos (Númeru 1 iha Sudeste Aziátiku), ne’e signifika katak maioria populasaun iha territóriu nasionál seidauk iha rendimentu sufisiente ba sustenta ekonomia família. Husi survey TLSLS hatudu liña pobreza nasionál mak $46.37 kada ema kada fulan, signifika ema ida hetan $1.55 kada loron.

• Aspetu Sosiál ;

Aleinde ne’e, laiha Funsionáriu Postu Administrativu (FPA) no Grupu Maneja Fasilidade (GMF) ne’ebé la funsiona ho di’ak impaktu mós ba sustentabilidade sistema bee iha area rurál sira (Dadus Survey PN-BESI-TL iha tinan 2023, Sistema ne’ebé la ho GMF funsiona 27%, GMF la ativu funsiona 34%, GMF ladún ativu funsiona 40% no GMF ativu sistema funsiona 50%)

Situasaun asesu ba infrastrutura bázika (bee moos no saneamentu) ne’ebé la adekuadu no inkluzivu no sustentável ba iha komunidade sira inklui iha eskola, Postu Saúde no sentru saúde kontribui mós ba númeru malnutrisaun 47.1% labarik ho idade 0-5 Stunting/Raes Badak (MoH, 2020),

• Aspetu Investimentu Orsamentu ;

Observa katak alokasaun OJE iha 2024 ne’ebé aloka ba setór Bee no Saneamentu kontinua la natoon ba setór Bee no Saneamentu purvolta 1.3% de’it husi totál OGE.

Orsamentu ba Munisípiu sira laiha Orsamentu ba kategoria Kapitál Dezenvolvimentu no Kapitál Menor so iha de'it mak orsamentu ba Salariu & Vensimentu no mós Beins & Servisu inklui orsamentu ba Servisu Munisipál Agua, Saneamentu e Ambiente (SMASA) kontinua laiha alokasaun orsamentu espesifiku ba Operasaun & Manutensaun ba Bee no Saneamentu (Ezemplu; Orsamentu Operasaun & Manutensaun ba iha SMASA Munisipiu Viqueque ho montante $10.000.00, SMASA Munisipiu Bobonaro iha de’it orsamentu ho montante $3000.00 atu hadi’a sistema ki’ik sira inklui halo Operasaun no Manutensaun ba Sistema sira)

Iha alokasaun Orsamentu Jerál do Estadu Governu seidauk prioritiza hodi aloka Orsamentu ba Garante rekursu Bee hodi bele fornese Bee ba Komunidade sira iha tempu bailoro, liu-liu oinsá atu bele reforsa Polítika Konservasaun Bee no Rai inklui mós polítika ba halo konstrusaun barrajen iha territóriu laran hodi bele prezerva udan Been bazeia ba PEDN ne’ebe trasa ona .

II. Rekomendasaun ;

1. Husu ba Governu atu investe ba setór Bee moos, Saneamentu no Ijiene liu husi Orsamentu Jerál do Estadu (OJE 2025) mínimu purvolta 3% hodi materializa Programa IX Governu nian ne’ebé sita “3.3 Investimentu ba asesu Bee moos no Saneamentu Báziku labele adia (ka dada) tan. Laiha infrastrutura ida ne’e mak sei afeta ba saúde públika ka hada’et moras, mate no dezenvolvimentu la di’ak ba labarik sira”

2. Husu mós katak, atu garante Sustentabilidade fornesimentu Bee moos ba Komunidade sira, liu-liu iha area rurais mak presiza iha alokasaun OGE ba Munisípiu sira liu-liu alokasaun Orsamentu kategoria ba Operasaun & Manutensaun ne’ebé adekuadu, inklui ba Servisu Munisipál Agua, Saneamentu no Ambiente (SMASA) presiza iha aumentu pesoál Funsionáriu Postu Administrativu (FPA) atu bele apoiu no monitoriza sistema sira, inklui reforsa Grupu Maneja Fasilidade (GMF) iha area rurál.

3. Husu mós ba Governu atu nafatin prioritiza iha alokasaun Orsamentu Jerál do Estadu (OGE 2025) ba atividade Konservasaun rekursu bee (bee ulun) sira nune’e bele salva udan been infiltra ba rai laran hodi fornese bee ba bee-matan sira iha territóriu tomak, inklui hahú investe ba konstrusaun barrajen iha territóriu laran atu bele prezerva no sai hanesan armajenamentu ba udan been hodi bele garante fornesimentu Bee ne’ebe sustentável ba komunidade inklui setór Agrikultura no mós hamenus risku afetasaun ba Mudansa Klimátika iha Timor-Leste.

Prepara Husi; Koñesimentu Husi;

Januario A. de Jesus Esmenia Laura Ximenes

Koordenador PN-BESI-TL Prezidente Konsellu Fiskál